فضيحة فساد تهزّ الاتحاد الأرجنتيني وتهدّد مشاركة الألبيسيليستي في مونديال 2026

فضيحة فساد مالي كبيرة تهزّ كرة القدم في الأرجنتين، بعد ما طالت الاتهامات الاتحاد الأرجنتيني لكرة القدم. قضية تنجّم توصل حتى لإقصاء المنتخب الأرجنتيني من كأس العالم 2026، رغم تتويجه باللقب في مونديال قطر 2022، حسب ما أكدته وسائل إعلام محلية من بينها جريدة لا ناسيون

القضية بدات بتحقيق قضائي في شبهات تبييض أموال، واللي خلّى السلطات تنفّذ ما بين 25 و30 عملية تفتيش شملت مقرّ الاتحاد وعدد من الأندية. التحقيقات تمسّ أسماء ثقيلة داخل الاتحاد. على رأسهم الرئيس كلاوديو “تشيكي” تابيا، ومعاه مقرّبين كيما بابلو توفيخينو ونائب أمين المال لوتشيانو ناكيس، وسط شكوك حول تكوين ثروات كبيرة بطرق غير قانونية

التحقيق مركّز بالأساس على شركة مالية اسمها “Sur Finanzas”، كانت سبونسور لعدة أندية وللمنتخب الأرجنتيني في 2024، ويُشتبه في تورّطها في اختلاسات وتهرّب ضريبي بقيمة تقرّب لنصّ مليار يورو. الشركة يملكها رجل الأعمال لويس فاييخو، المعروف بقربه من رئيس الاتحاد. وزادة التحقيقات شملت ملك فخم على مساحة 10 هكتارات، فيه مهبط طيارات، مزرعة خيول وأكثر من 50 كرهبة فاخرة، يُعتقد اللي مسجّلين بأسماء صورية

خطورة القضية تكمن في احتمال تدخّل الدولة في شؤون الاتحاد، واللي ينجم يخلّي الأرجنتين تدخل في صدام مباشر مع الفيفا، اللي ترفض أي تدخّل حكومي في عمل الاتحادات الكروية. وحسب لا ناسيون، الفيفا تنجّم توصل حتى لإقصاء الأرجنتين من مونديال 2026 كان تثبت التجاوزات وما تتعالجش في وقتها عبر القضاء

ورغم اللي منتخب “الألبيسيليستي” ضمن رسميًا الترشّح لكأس العالم اللي باش تدور في الولايات المتحدة وكندا والمكسيك، ووقع في مجموعة تبدو في المتناول، الفضيحة هاذي خلّت مشاركته في وضعية قانونية حسّاسة، في انتظار قرارات القضاء الأرجنتيني، اللي تنجّم تحدّد مصير الاتحاد، وربما حتى مصير بطل العالم في المونديال الجاي